Фото: bbc.com 

6 қыркүйекте Минск соты Беларус оппозициясы көсемдерінің бірі Мария Колесникованы 11 жылға, оның жақтасы әрі заңгері Максим Знакты 10 жылға түрмеге жапты. Мұны BBC хабарлайды. 

Екеуіне: 

• ұлт қауіпсіздігіне қарсы әрекет етуге үгіттеді;
• экстремист топ құрды;
• мемлекеттік билікті басып алу үшін астыртын сөз байласты деген айыптар тағылды. 

2020 жылғы 9 тамызда президент сайлаудан кейін Беларуста жаппай наразылық басталған еді. Наразылар сайлау қорытындысы бұрмаланғанына, Светлана Тихановская емес, Александр Лукашенко президент болғанына қарсы шықты. 

Мария Колесникова — беларус оппозициясының басты тұлғаларының бірі. Кандидат Виктор Бабариконың штабын басқарды. Полиция Бабариконы тұтқындағанда Светлана Тихановская, Вероника Цепкало мен Мария Колесникова бірігіп, үлкен сайлауалды кампания ұйымдастырды. 

Сол жылғы 8 қыркүйекте күш құрылымдары Колесникованы елден шығарып жібермек болды. Бірақ саясаткер құжатын жыртып тастап, Беларустан кетуден бас тартты. Ертеңіне ол тұтқындалып, тергеу изоляторына қамалды.